Hakunaga

Lugha tunaikanyaga, tena twaisagasaga,
Sanaa tunacharanga, sarufi kuikoroga,
Na walozuka waringa, wauzungusha ushanga,
'Hakunaga' mashallah, ila lugha twaboronga!

Ningelipiga ukunga, halifai hili boga,
Linanitia uoga, Kiswahili kukoroga,
Makosa tunayofuga, yatakuja kutubwaga,
'Hakunaga' mashallah, ila lugha twaboronga!

Tunayavunja mafiga, wapi ugali kusonga?
Ni nani tunamkoga, hadi asili kunyonga,
Naona twajivuruga, na mashuleni kuloga,
'Hakunaga' mashallah, ila lugha twaboronga!

Msukuma na Mchagga, wawe ni bega kwa bega,
Wasdhuru vifaranga, kuku wasiache taga,
Wahamanike malenga, nani lugha kuichunga,
'Hakunaga' mashallah, ila lugha twaboronga!
'Hakunaga' mashallah, ila lugha twaboronga!

Taifa limeyabwaga, yaliyo yake manyanga,
Lugha nani aifuga, uchumi ije kutaga,
Tutabaki twapuynga, wengine njaa waganga,
'Hakunaga' mashallah, ila lugha twaboronga!

Kama lipo la kuiga, usi'ge tetekuwanga,
Kama wapanda mpunga, ngano huwezi kusonga,
Kilichobaki kuchabanga, na wanga kuja kuwanga,
'Hakunaga' mashallah, ila lugha twaboronga!

Sanaa isiyo kinga, hutabana na waganga,
Kuilea si uchunga, ni huru wake mzinga,
Nchi isiyo malenga, kiuno kisicho shanga,
'Hakunaga' mashallah, ila lugha twaboronga!

Waume huvaa kanga, na miguu kuwa nanga,
Kuondoka ni wahanga, hawaachi kujivunga,
Moyoni yakiwasonga, uongo wataupanga,
'Hakunaga' mashallah, ila lugha twaboronga!

Ala wasiozipanga, hawajauona mwanga,
Hayo wanayoyatunga, ni upepo unaomanga,
Huenda kutangatanga, na kisha kujicharanga,
'Hakunaga' mashallah, ila lugha twaboronga!


© 2011 Sammy Makilla