C H A M A ?

 

USHABIKI wa kijinga, zama zake zaishia,

Watu sasa wanachanga, yenye hoja kuchengia,

Si rahisi kuwavunga, njia wakazifungua,

kodi yajenga taifa, toka lini kiwe chama ?

Kodi yajenga taifa, toka lini kiwe chama ?

 

Uongo wakiizua, ukweli watajibiwa,

Hakuna asiyejua, kodi yajenga dunia,

Wao wakituambia, vingine hatutajua,

Kodi yajenga taifa, toka lini kiwe chama ?

 

Yeyote anayekuwa, dola ameichukua,

Hukusanya kikajaa, kisha akakitumia,

Kula haiwi ridhaa, ila watu kuwafaa,

Kodi yajenga taifa, toka lini kiwe chama ?

 

Wao inaelekea, huanza kwa kujilia,

Kisha wakavigawa, kwa ndugu pia jamaa,

Kidogo kinachobakia, ndio wakatuhadaa,

Kodi yajenga taifa, toka lini kiwe chama ?

 

Vikubwa vingelikuwa, vyema ingelitumia,

Kodi tuliyoitoa, wala ndogo haikuwa,

Ujanja wametumia, bianfsi kuwafaa,

Kodi yajenga taifa, toka lini kiwe chama ?

 

Kwa uongo kuutia, ndio watu wachukia,

Ukweli mkiutoa, watu watawaelewa,

Mlavyo mmejaliwa,nafasi mliyokaa,

Kodi yajenga taifa, toka lini kiwe chama ?

 

Ila si kutuambia, wengine watafulia,

Kazi hawataijua,ila mliojaliwa,

Ndio tu mnaelewa, hazina kusimamia,

Kodi yajenga taifa, toka lini kiwe chama ?

 

Kama hivyo kungekuwa, vipi nako kwaibiwa,

Milango mmefungua, au chama kujifaa,

Mbona mwagugumia, ukweli hatujajua ?

Kodi yajenga taifa, toka lini kiwe chama ?

 

Uongozi si sanaa, ujuzi unatakiwa,

Na kila mwenye kujua, siasa alielewa,

Vingine haitakuwa, ila kwa wanaoelwa,

Kodi yajenga taifa, toka lini kiwe chama ?

 

Ila kwa wanaoelwa,  watakao kuimbiwa,

Mapambo wakapambiwa, matapishi yamejaa,

Kinyqa kisipokuwa, maajabu hutokea,

Kodi yajenga taifa, toka lini kiwe chama ?

 

Kodi dereva ikiwa, nchi inatengamaa,

Udhibiti usopwaya, malengo yakatimia,

Watu wakajisema, nchi yenyewe yakuwa,

Kodi yajenga taifa, toka lini kiwe chama ?

 

Kodi ikishachezewa, haliwi hata la kuwa,

Kila kitu kitapwaya, na chuki zikaanzia,

Wenyewe kujiibia, hayo huwa yatokea,

Kodi yajenga taifa, toka lini kiwe chama ?

 

Uswizi zinazokaa, watu hazijawafaa,

Huenda wakajifia, kisha bure kupotea,

Na wana kuwa vichaa, zikashindwa kuwalea,

Kodi yajenga taifa, toka lini kiwe chama ?

 

Batili ikitumiwa, mtenzi anaumia,

Awali hakuyajua, ukubwani hutokea,

Macho akifungulia, roho akaagulia,

Kodi yajenga taifa, toka lini kiwe chama ?

 

Haki ya mtu kuliwa, hilo halijaruhusiwa,

Kuna siku huwadia, deni kwenda kulipiwa,

Kama baba haikuwa, wana wake itakuwa,

Kodi yajenga taifa, toka lini kiwe chama ?

 

Tamaa waliojaa, kidogo wakipokea,

Kikubwa hukiachia, kikaenda kupotea,

Yao wakaangalia, si yetu kutulindia,

Kodi yajenga taifa, toka lini kiwe chama ?

 

Kumbe kinachotokea, ni kama kupotezea,

Wakuu wakishapewa, ni ruhusa kupotea,

Udhibiti twafulia, bado tunashangilia ?

Kodi yajenga taifa, toka lini kiwe chama ?

 

Hazina inachopokea, hivi nusu chafikia,

Mwakyembe akitua, mbona kingi chavuliwa ?

Nini kinachotokea, mbona hamjatwambia,

Kodi yajenga taifa, toka lini kiwe chama ?

 

Hivi kadi ya Slaa, ni mazito kuliko haya,

Chama mnatuhumiwa, mashamba ya bibi kunywea,

Au hamjasikia, huko mnakopitia ?

Kodi yajenga taifa, toka lini kiwe chama ?

 

Itajengwa Tanzania, fedha zisipopotea,

Nyie mnaziachia, watu waenda chezea,

Mtu milioni mia, kwa siku moya azoa ?

Kodi yajenga taifa, toka lini kiwe chama ?

 

Marudufu yakitua, kisha vyema kutumiwa,

Itafufuka Tanzania, na kisha kuanza kupaa,

Hapo stahi itakuwa, sasa kuanza sifiwa,

Kodi yajenga taifa, toka lini kiwe chama ?

 

Kujipanga yatakiwa, tena haraka ikawa,

Kizidicho kuingia, wachache kutojilia,

Kumbe tulichojaliwa, wote chaweza tufaa ?

Kodi yajenga taifa, toka lini kiwe chama ?