Dunia inachokosa

Ni ucha Mungu na haki, dunia inachokosa,
Wanyonge tunadhihaki, hali yao twaijua?
Nafuu yao hamaki, na moto mwajiwashia,
Dunia inachokosa, ni haki na ucha-Mungu!

Mnataka wale keki, mkata hawajapewa,
Posho mnaziafiki, mwawazidishia ukiwa,
UOni mwaufariki, vipofu mmeshakua,
Dunia inachotaka, ni haki na ucha-Mungu!

Muumba hakasiriki, hadi mnyonge kuuawa,
Haya mnayoafiki, umauti mwatutia,
Kila mnachobariki, ni wizi uliokuwa,
Dunia inachokosa, ni haki na ucha-Mungu!

Afriti wajinaki, nchi wameichukua,
Madharibi na mashariki, yasoyao wachimbua,
Yanabaki mahandaki, kisha na wetu ukiwa,
Dunia inachotaka, ni haki na ucha-Mungu!

Shilingi hatumiliki, punde mmeichukua,
Safari yetu mikiki, twendako tunachelea,
Ninaona hatufiki, tulikokwisha ahidiwa,
Dunia inachokosa, ni haki na ucha-Mungu!

Shetani anashiriki, wengine kuwatumia,
Ubia kaumiliki, kila kona twajionea,
Balaa zikihakiki, hakuna wa kuzuia,
Dunia inachotaka, ni haki na ucha-Mungu!

Naichelea Iraki, Tanzania kuja kuwa,
Viongozi wanafiki, vibaya kutumia,
Wenyewe watabaaki, matanuzi kwendelea,
Dunia inachokosa, ni haki na ucha-Mungu!

Usiache tubariki, sisi tunaopotea,
Tuiepuke mikiki, tusiyoitazamia,
Umoja usifariki, masikini sana kua,
Dunia inachotaka, ni haki na ucha-Mungu!