Nimeumbwa kwa udongo

Sikuumbwa kwa uongo, nimeumbwa kwa udongo,
Tanzania sio Kongo, kwenye nyumba sio pango,
Mkamilifu maungo, roho pia na ubongo,
Nimeumbwa kwa udongo, sikuumbwa kwa uongo !

Na hata bila ya bango, nimeacha kikaango,
Naketi kwenye ulingo, na habari za vitengo,
Wala siogopi zongo, mfungo sio mfungo,
Nimeumbwa kwa udongo, sikuumbwa kwa uongo !

Siwezi kubali hongo, ili niwe nami mwongo,
Nikijaribu ya gongo, utaniua msongo,
Hawezi akawa chongo, makengeza kwa uongo,
Nimeumbwa kwa udongo, sikuumbwa kwa uongo !

Siukubali tongotongo, hayo namwachia fungo,
Ardhini kwenye kingo, awezaye masimango,
Kweli wangu mviringo, dunia yangu ni ndogo,
Nimeumbwa kwa udongo, sikuumbwa kwa uongo !