Mikoa mingine mikubwa kuliko nchi ....

TUME ninaiambia, kuna pande yaonewa,
Na hivyo mlivyokaa, haya yote mwayajua,
Kuna mingine mikoa,  zaidi ya nchi huwa,
Hadhi sawa ikipewa, mikoa na Zanzibar:
Ndio haki itakuwa,
Na mikoa kwendelea,
Ushindani ukakua
Ikomboke Tanzania!

Mikoa inatakiwa, viongozi kuchagua,
Si wa kuteuliwa, zawadi wanaopewa,
Kuwajibika ikawa, kitu wazi kilokuwa,
Hadhi sawa ikipewa, mikoa na Zanzibar:
Ndio haki itakuwa,
Viongozi kuchagua,
Kusimamia mikoa,
Huru ikawa mikoa.

Haki zao walilia, watu kwenye mikoa,
Serikali kuu mbia, ndio iwe na mikoa,
Yenyewe kutoamua, yanayohusu mkoa,
Hadhi sawa ikipewa, mikoa na Zanzibar:
Ndio haki itakuwa,
Mikoa kutovamia,
Rasilimali kutowa
Wazawa wakawa sawa!

Mbalimbali itakuwa, kiutawala mikoa,
Ila ni kimoja twawa, shirikisho kutulea,
Pasiwe wa kuonewa, wala wa kupendelewa,
Hadhi sawa ikipewa, mikoa na Zanzibar:
Ndio haki itakuwa,
Shirikisho kuwa dawa,
Haki kuziangalia,
Mkoa kutojichafua !

Vyuo vikuu kuzua, wana wakajisomea,
Na si kujipendelea, wakubwa wlaiokuwa,
Ni haki kila mkoa, chuo kujijengea,
Hadhi sawa ikipewa, mikoa na Zanzibar:
Ndio haki itakuwa,
Chuo Kikuu kuzua,
Iwe hadhi ya mkoa,
Na yao kuangalia.

Waziri mkuu akiwa, haki ataangalia,
Mkoa kuutetea, mamboye kufanikiwa,
Nchi jirani zikawa, uchumi zinachangia,
Hadhi sawa ikipewa, mikoa na Zanzibar:
Ndio haki itakuwa,
Waziri Mkuu akawa,
Asimamia mkoa,
Wakazi wamemchagua!

Shule watazipanua, kimataifa zikawa,
Wanafunzi wakajaa, nchi jirani watokea,
Elimu kufurahia, hadhi juu imekuwa,
Hadhi sawa ikipewa, mikoa na Zanzibar:
Ndio haki itakuwa,
Mawaziri wa mkoa,
Wawe wamsaidia,
Mkoa haraka kukua.

Hospitali kung'aa, huduma zinazofaa,
Tele vikawa vifaa, kupima na kutibia,
Nje wanaotibiwa, hapa kwetu kupokelewa,
Hadhi sawa ikipewa, mikoa na Zanzibar:
Ndio haki itakuwa,
Mawaziri wa mkoa,
Wawe wamsaidia,
Mkoa haraka kukua.

Huko ni kuendelea, si ngonjera kutia,
Kufumba na kufumbua, hutoijua Tanzania,
Ni nyingine itakuwa, daraja kujiipandia,
Hadhi sawa ikipewa, mikoa na Zanzibar:
Ndio haki itakuwa,
Mawaziri wa mkoa,
Wawe wamsaidia,
Mkoa haraka kukua.


Bunge litalozaliwa, la  mkoa litakuwa,
Muda kidogo kongea, mwingi ni kutumikia,
Vijijini kuingia, matatizo kutatua,
Hadhi sawa ikipewa, mikoa na Zanzibar:
Ndio haki itakuwa,
Pawe na bunge la mkoa,
Maendeleo lalea,
'Wakilishi maridhia.

Wajumbe wake wakawa, maslahi watetea,
Makundi yote ya mkoa, uwakilishi wakawa,
Na yao kuangaliwa, daima yahifadhiwa,
Hadhi sawa ikipewa, mikoa na Zanzibar:
Ndio haki itakuwa,
Pawe na bunge la mkoa,
Maendeleo lalea,
'Wakilishi maridhia.

Wakulima kuingia, wafanyakazi nao pia,
Wakwezi wakaenea, mipando kuzungumzia,
Hata pia injinia, na madaktari radhia,
Hadhi sawa ikipewa, mikoa na Zanzibar:
Ndio haki itakuwa,
Hawa hawatasinzia,
Kuitetea mikoa,
Fani zao watokea,
Ya kwao wapigania.

Mamlaka twatakiwa, katiba iliamua,
Mikoani kuingia, wakazi wakachukua,
Leo twang'ang'ania, aibu tunajitia,
Hadhi sawa ikipewa, mikoa na Zanzibar:
Ndio haki itakuwa,
Kutonyonga vyakukua,
Nchi kubwa twaijua,
Dar mbali yasogea !

Atuongoze Jalia, marhaba yetu kuwa,
Tuijenga Tanzania, mpya iliyokuwa,
Na vizazi kushanga, akili tulivyotumia,
Hadhi sawa ikipewa, mikoa na Zanzibar:
Ndio haki itakuwa,
Hivi hamjakujua,
Dunia yaelekea
Nchi ndogo kuzaliwa,
Na kubwa zikajifia !!!