Mji kukosa tovuti

Redio isipokua, vigumu kuendelea,
Hapatazungumziwa, matatizo yalokua,
Na jinsi ya kutatua, mkoa kuendelea,
Mji kukosa tovuti, vigumu kuendelea!

Wapi watazungumzia, muhimu yaliyokua,
Hoja wakazisikia, na aula kuchagua,
Kisha kujajipangia, na bajeti kuandaa,
Mji kukosa tovuti, vigumu kuendelea!

Mikakati kuamua, mkoa unaofaa,
Mbinu wakazichambua, kazi rahisi ikawa,
Miaka ikapungua, afueni kutokea,
Mji kukosa tovuti, vigumu kuendelea!

Gazeti lisipokua, wajinga wanachanua,
Hoja hawatazijua, ndiyo wataitikia,
Viongozi huchagua, wale wasiowafaa,
Mji kukosa tovuti, vigumu kuendelea!

Wananchi wataibiwa, kila chao kilokua,
Rasilimali hupaa, na mali asili pia,
Na fedha hukwapuliwa, mchana wajionea,
Mji kukosa tovuti, vigumu kuendelea!

Tovuti isipokuwa, ni mji uliovia,
Watalii hukimbia, hapo tena hawatakaa,
Kwingine huelekea, mawasiliano yakawa,
Mji kukosa tovuti, vigumu kuendelea!

Televisheni kupwaya, mji huja kudumaa,
Katu hautaendelea, utazidi kusinyaa,
Na vijana husanzua, jijini kukimbilia,
Mji kukosa tovuti, vigumu kuendelea!

Simu zisipoenea, mawasiliano huvia,
Vijana hupakimbia, kwingine wakaingia,
Kamwe hawatasalia, hata ukiwafungia,
Mji kukosa tovuti, vigumu kuendelea!

Wakati tumefikia, maamuzi kuamua,
Redio za umma kua, kila mji Tanzania,
Ya mji kuzungumzia, na yanayotarajiwa,
Mji kukosa tovuti, vigumu kuendelea!

Magazeti nayo pia, kila mji yatakiwa,
Habari zao kujua, mambo kuchangamkia,
Ya wengine kusikia, kurasa zinazofatia,
Mji kukosa tovuti, vigumu kuendelea!

Tovuti tunatakiwa, kila kona kuchanua,
Ukienda kutembea, Google wajipatia,
Migawaha maridhawa, huduma ikazitoa,
Mji kukosa tovuti, vigumu kuendelea!

Televisheni mbia, picha inatupatia,
Ni mengi tunayojua, papo hapo kujionea,
Ziara kujifanzia, hali chumbani twakaa,
Mji kukosa tovuti, vigumu kuendelea!

Wakale hawakujua, umuhimu ulokua,
Uongo walichelea, gizani tukabakia,
Alamu katujalia, sasa zaangazia,
Mji kukosa tovuti, vigumu kuendelea!

Ila kinachotokea, uchafu zinachukua,
Bado hatujajitambua, wenyewe twajiumbua,
Viongozi watakiwa, hili kuliangalia,
Mji kukosa tovuti, vigumu kuendelea!

Zingekuwa za mkoa, vyemja zingedhibitiwa,
Kumoja kutolemea, na kwingine kuonea,
Na wanaosimamia, umiliki kuchukua,
Mji kukosa tovuti, vigumu kuendelea!

Muhimu yangelikuwa, yanayozungumziwa,
Miji ije kuchanua, kama Ulaya ikawa,
Ikang'ara Tanzania, hadi huko Malaysia,
Mji kukosa tovuti, vigumu kuendelea!


© 2011 Sammy Makilla