Friday, November 2, 2012
Pepo za mabadiliko ...
SITINI zilipepea, uhuru kujipatia,
Bendera zikapepewa, uenyeji kuutia,
Weusi wakakitwaa, weupe walichotwibia,
Pepo za mabadiliko, nani atazizuia ?
Zimevuma na kulewa, na hewa zinagombea,
Mashimo yafyatuliwa, hewani yakabakia,
Vyombo sasa vyaelea,kuso dira kwelekea,
Pepo za mabadiliko, nani atazizuia ?
Tafakuri zajifia, ubaya waning'inia,
Wakubwa wanapepewa, siye j oto twaungua,
Zuri wakalikataa, na gizani kwelekea,
Pepo za mabadiliko, nani atazizuia ?
Kaskazini zaanzia, chini zinaelekea,
Kama kuta naambiwa, mkono ukitumia,
Kama ngumi waitia, viganja utaumia,
Pepo za mabadiliko, nani atazizuia ?
Kusini zinatokea, zinazodai usawa,
Katikati tumekaa, zinakuja kuingia,
Na wala hatujaamua, nini cha kujifanzia,
Pepo za mabadiliko, nani atazizuia ?
Pepo hizi zanua, kuiva demokrasia,
Kisha haki kutumia, si umbeya kusikia,
Vinginevyo ikiwa, wenyewe tutaumia,
Pepo za mabadiliko, nani atazizuia ?
Pepo zataka ruia, njia ya kuelekea,
Sio gizani twakaa, wengine wakijilia,
Harufu twaisikia, mlo hatujajionea,
Pepo za mabadiliko, nani atazizuia ?
Pepo hizi za kugawa, rasilimali kwa sawa,
Isiwe kuna waliwa, chakula wakingojea,
Kumbe juu wamekaa, wao wanaojilia,
Pepo za mabadiliko, nani atazizuia ?
Pepo zataka afua, na nafuu kuijua,
Na wala sio mafua, kikohozi kukohoa,
Na kuibadili tabia, ndyo dawa ya kufaa,
Pepo za mabadiliko, nani atazizuia ?
Pepo zataka usia, wa juu wakausikia,
Wakaiacha nazaa, na ubaya kuuzua,
Kwa vipi aso silaha, ni muanzisha ghasia,
Pepo za mabadiliko, nani atazizuia ?
Huyo ni wa kutania, mchezo wa mwana kulea,
Mkono ukimtoa, nani kukuangalia,
Kula asojitambua, hili hawezi kwelewa,
Pepo za mabadiliko, nani atazizuia ?
Pepo zimeshanuia, zama mpya kwingia,
Zaja kwa kufunguliwa, au zenyewe kufungua,
Hakuna wa kuzizuia, hili sana nalijua,
Pepo za mabadiliko, nani atazizuia ?
Nanyi mtajionea, yangu msiosikia,
Zaja zikisadiwa, kwa tufani na mvua,
Nchi tope itakuwa, mitaro tusipochimbua,
Pepo za mabadiliko, nani atazizuia ?
Minyororo tukitia, itakuja kuachia,
Kuna nguvu za dunia, zaendeshwa na ukiwa,
Katikati kiinngia, kinyamkera chaua,
Pepo za mabadiliko, nani atazizuia ?
Naihofia balaa, ninamuomba Jalia,
Yajayo kujitambua, njia bora kuchagua,
Tusijitie unaa, yakaja kutukong'oa,
Pepo za mabadiliko, nani atazizuia ?
Subscribe to:
Post Comments (Atom)
No comments:
Post a Comment