MAJI YAKIZIDI UNGA

Uwakilishi nchini, uwe watu thelathinini,

Mkoa kuwadhamini, wasijeuzwa sokoni,

Tukawa nayo yakini, wanafanza kitu gani,

Maji yakizidi unga, huwa uji si ugali !



China kwenye bilioni, hawazidi ishirini,

Na wote mkutanoni, elfu mbili naamini,

Sisi tuna zuri gani, idadi kuisaini ?

Maji yakizidi unga, huwa uji si ugali !



Rasilimali ni duni, twajitia umaskini,

Kwa kujitia uzani, bila ya hiyo thamani,

Huu ni utundu gani, atwepushe Maanani,

Maji yakizidi unga, huwa uji si ugali !



Twatumia bilioni, na njaa wafa nchini?

Kwayo twamkoga nani, viumbe nawaulizeni ?

Au awapeni nani, vya bure kuviamini?

Maji yakizidi unga, huwa uji si ugali !



Mia tisa takribani, hesabu kuisaini,

Na wote mkutanoni, mia tisa kubaini,

Watachagua makini, kero pasiwepo ndani,

Maji yakizidi unga, huwa uji si ugali !



Zama gani ulizeni, hizi tulizo njiani,

Na nini wanatamani, waliokuwapo chini,

Si fahari na uhuni, ila ya kesho yakini,

Maji yakizidi unga, huwa uji si ugali !



Waenda sema nini, na simu zi mdomoni,

Wanajua kitu gani, tuendako hawaoni,

Hao wamzuga nani, kilivhozidi kichwani,

Maji yakizidi unga, huwa uji si ugali !



Sijaiona yakini, ya kuongeza thamani,

Ila usanii ndani, na nyimbo za uzaini,

Hakuna matumaini, kila mtu yu shakani,

Maji yakizidi unga, huwa uji si ugali !



Wapasao kilingeni, wajue wasema nini,

Kisha kujiulizani, wanamwakilisha nani,

Wametumwa kitu gani, ili wapate auni,

Maji yakizidi unga, huwa uji si ugali !



Nyimbo za utusani, zamsaidia nani,

Kama sio uhuni, na kujishusha thamani,

Mambo sasa umakini, sio ya vijiweni,

Maji yakizidi unga, huwa uji si ugali !



Hivi mna hoja gani, za kutenda jambo gani,

Uishe umaskini, sisi tuwe kivulini,

Maji yaje vijijini, tuoge kwetu uani,

Maji yakizidi unga, huwa uji si ugali !



Mifereji tubaini, tupande kwetu jirani,

Si kwetu mafichoni, pasibaki mtu nyumbani,

Zinatuisha hisani, mgoni hatubaini,

Maji yakizidi unga, huwa uji si ugali !



Twataka tuwe nuruni, si hadhithi viwanjani,

Kasoro hatubaini, umeme kutuzaini,

Toka mwaka wa sitini, karne ya zamani ?

Maji yakizidi unga, huwa uji si ugali !



Haya maendeleo gani, ya kutembea kijani,

Ukiangalia chini, kwa hapo hauioni,

Zinawaka mijengoni, sio kwetu vijijini,

Maji yakizidi unga, huwa uji si ugali !



Watumishi vijijini, tuwekeni ujirani,

Tuwaongeze thamani, kuamke vijijini,

Twawapa umaskini, kisha wamwongoze nani ?

Maji yakizidi unga, huwa uji si ugali !



Mikakati tubaini, wanaofanya auni,

Hao ndio wawe ndani, kati yao thelathini,

Kusimulia kundini, mbinu walizobaini,

Maji yakizidi unga, huwa uji si ugali !



Kusimulia kundini, mbinu walizobaini,

Hata kwao kijijini, kukawa kunashaini,

Tunasaga kina nani, vigelegele kughani ?

Maji yakizidi unga, huwa uji si ugali !



Wawe ni watu makini, wanajenga vijijini,

Maisha kuwa yamini, kuliko kwetu mijini,

Na sisi tukatamani, kurudia vijijini,

Maji yakizidi unga, huwa uji si ugali !



Kwalo ninaamini, chama wengi kitawini,

Kukishakuwa mwangani, huko kwetu vijijini,

Atabisha mtu gani, ustawi hauoni ?

Maji yakizidi unga, huwa uji si ugali !