Niacheni nitafute, shairi lililo bora,
Jambo gani nilitete,lifanane nayo sura,
Kamba gani niivute, mbele niweze sowera,
Mtunzi vipi nipate, shairi lililo bora?
Ni wapi nimtafute, mwalimu mwenye bishara,
Miguuni niokote, bila mkubwa duara,
Akilini niyavute, yasiyo na masihara,
Mtunzi vipi nipate, shairi lililo bora?
Wazima hata viwete, waje iona kudura,
Kilio chao nipete, na ukweli kuzurura,
Ili ulimwengu wote, iwe ni yangu hadhira,
Mtunzi vipi nipate, shairi lililo bora?
Ipi niicheze kete, nipate hii nusura,
Dua ipi niilete, niyapate maghufira,
Naimatulaa alete, iliyo kubwa ashura,
Mtunzi vipi nipate, shairi lililo bora?
Mie nani nimuite, kilicho bora kuchora,
Picha watu iwaite, waikubali kafara,
Masimulizi watete, isiwe kwangu hasara,
Mtunzi vipi nipate, shairi lililo bora?
Subscribe to:
Post Comments (Atom)
No comments:
Post a Comment