Kimya mpenzi wangu

Nampenda Ukimya, kwa tabia na mapozi,
Kwa hakika katulia, si mtu wa maongezi,
Ila langu alijua, sihitaji usakizi,
Kimya mpenzi wangu, ni nani zaidi yake ?

Hata bila kuongea, mie kwake niko wazi,
Nina raha aijua, kwenye dhiki mdowezi,
Na siku haitoishia, asiwe ni mng'amuzi,
Kimya mpenzi wangu, ni nani zaidi yake ?

Nampenda kwa tabia, pia yake maamuzi,
Kati akiingilia, hakuna wa kuniudhi,
Huwa ninajiondoa, ukabakia ushuzi,
Kimya mpenzi wangu, ni nani zaidi yake ?

Nampenda Ukimya, pawapo na wapuuzi,
Masikio humwatia, akasikiza ajizi,
Naye akaniambia, nimtukuze Mwenyezi,
Kimya mpenzi wangu, ni nani zaidi yake ?

Kumtaja hufurahia, hunikumbusha Azizi,
Na kila akiingia, akanipa mazoezi,
Tasbihi kuzitwaa, kumtukuza Muizzi,
Kimya mpenzi wangu, ni nani zaidi yake ?

Nimemkubali Ukimya, na kuipanda mizizi,
Hapa kwake natulia, ngoma hii kwangu saizi,
Wengine ninakimbia, kelele zao siwezi,
Kimya mpenzi wangu, ni nani zaidi yake ?

Anitosha kadiria, hanichoshi, hanikwazi,
Kila nikimhitajia, wala hafanyi ajizi,
Huja nami katulia, nikapata usingizi,
Kimya mpenzi wangu, ni nani zaidi yake ?

Pendo nimetamkiwa,  kuliachia siwezi,
Yabidi kushikilia, kwa miaka ni mjuzi,
Nalo nikipalilia, nyasi kutoa si kazi,
Kimya mpenzi wangu, ni nani zaidi yake ?