Kikombe hiki kitwae

Tusikinwe kiondoe, wito huu niutoe,
Manani tuhurumie, hili lisitufikie,
Ninajua hatarie, japo vipofu watuwe,
Kikombe hiki kitwae, kiondoe tusikinwe!

Chatisha usituwatie, Yarabi tuhurumie,
Viongozi tujalie, mara moja wakatae,
Kenya waiangalie, ulivyokuwa mwendowe,
Kikombe hiki kitwae, kiondoe tusikinwe!

Uarabuni watuwe, kwa macho wajionee,
Uchama usitugawe, kuuana tufikie,
Macho yote tufungue, kwa hilo utuopoe,
Kikombe hiki kitwae, kiondoe tusikinwe!

Utoto usiwatie, wakubwa wautumie,
Roho wakazitezee, burebure zipotee,
Kinaya hii tujue, na masiku tusikawie,
Kikombe hiki kitwae, kiondoe tusikinwe!

Taifa tulinyanyue, na utaifa upae,
Uchama tuuchukie, kama ndiyo matundae,
Ni kazi ya mimi na wewe, na wala  tusichelewe,
Kikombe hiki kitwae, kiondoe tusikinwe!