Huu ni wakati wetu

TWAPASHA wazazi wetu, miaka yao yaisha,
Walikuwa ni wenzetu, sasa wanajipaisha,
Ama nao kati yetu, ududu umeshakwisha,
Huu ni wakati wetu, zama zenu zimekwisha !

Hii sasa mida yetu, ni nani anayebisha,
Viti vyenu, viti vyetu, twawaomba harakisha,
Na wanenu si wenetu, nasi twaanza zalisha,
Huu ni wakati wetu, zama zenu zimekwisha !

Tuliwakopesha utu, mwatulipa magarasha,
Mwatugeuza viatu, tena vilivyokwishaisha,
Kumbe watu wana kutu, hilo latufadhaisha,
Huu ni wakati wetu, zama zenu zimekwisha !

Mmeifyeka misitu, mkimaliza maisha,
Na kwa wenu ubutu, mwateta mwala maisha,
Sisi sio watukutu, ila kweli mwatuchosha,
Huu ni wakati wetu, zama zenu zimekwisha !

Mlitutia ufyatu, kwa dola kuritadisha,
Ibilisi kawa mtu, ndani mwamkaribisha ?
Hakika sio wenzetu, mmekwishatuonesha,
Huu ni wakati wetu, zama zenu zimekwisha !

Mtatutia vigutu, pindi tusipowakomesha,
Mioyo yenu kama chatu, ndio maana twaisha,
Kweu mchafu utatu, mliokwishauanzisha,
Huu ni wakati wetu, zama zenu zimekwisha !

Wakowapi kina Tutu, chini wakawaketisha,
Wetu wana ukurutu, wanangoja kushibishwa,
Naona hamna kitu, wesha kabla ya kwisha,
Huu ni wakati wetu, zama zenu zimekwisha !

Hawa wetu ni Mobutu, wangoja siku kuisha,
Wengine heri vifutu, waweza jislamisha,
Sio Moro si Kidatu, hawana cha kuzalisha,
Huu ni wakati wetu, zama zenu zimekwisha !

Daladala ni matatu, jina wanabadilisha,
Mtu hawi ni kiatu, guuni ukajivisha,
Ndio hayao mwanakwetu, ama kwetu si maisha,
Huu ni wakati wetu, zama zenu zimekwisha !

Lao haliwi ni letu, ila watufananisha,
Nisisngecheza upatu, msingi wangeanzisha,
Kwangu si heri mtutu, zogo sitaki anzisha,
Huu ni wakati wetu, zama zenu zimekwisha !

Na makwao sio petu, vipi wajeniwezesha,
Nyumba iwe sio kitu, ila mali kuzalisha,
Hao nao sio watu, hili wangeshaanzisha,
Huu ni wakati wetu, zama zenu zimekwisha !

Wametugeuza ratu, sangari kuikomesha,
Hakika maji matitu, jihadi wanaanzisha,
Binadamu bila utu, huwezi ukamtisha,
Huu ni wakati wetu, zama zenu zimekwisha !

Na utu hauwi vitu, hili nawaelimisha,
Wito wenu sio wetu, haya tusipopitisha,
Sasa ni maisha yetu, ya kwenu yameshaisha,
Huu ni wakati wetu, zama zenu zimekwisha !

Sasa ni maisha yetu, ya kwenu yameshaisha,
Acheni nafasi zetu, hali kuziimarisha,
Mkatoa tahyatu, sala mkahitimisha,
Huu ni wakati wetu, zama zenu zimekwisha !

Malindi hadi Tumbatu, Shinyanga hadi Arusha,
Kwenye dhahabu na msitu, nia tunawakilisha,
Kiilichokuwa ni chetu, lazima kututajirisha,
Huu ni wakati wetu, zama zenu zimekwisha !